Mark 9

Yesu Dna Nwo Mwa-Mwa

1Yesu wa godu Wa gna Wo abara ge, “Aza zhilo ya nfye mi nɓata fyi m, sai ɓa gye Shekwoyi bemi kwoi ɓe dna ko ikwo yakwo kpa.”

2Anyi-pyei tnanyi, navun Yesu wa la Bitrus, n Yakubu yi n Yohanna yi ɓa gnulo epeshe. Zaho to ɓei shan knusun n ɓa yim safyewyi Owo awyeba ɓa shando ɓai bmiyana. 3Owo aje ɓai bmiyana n bui-bui yi pesheu n du anyi nya zhin dohodohoi n fwan-fwan. 4Safyewyi Musa n Iliya yi ɓa ɓe ɓa ya ɓeda n Yesu yi.

5Bitrus wa cige, “Male, ɓeye bmiya lo mwa. Yi ɓa kpe alubui ngnu ata ntu fye ɓo vinya.!”

6Wo ɓei da deye ntu ge wo to ɓei kpe ɓeye n wo ɓa shan dan, ɓa ku ɓa nya fyiya zhi n dnayi. 7Ama sa nwo ɓeye daɓo nyi, enyi kwa tuɓa fun kwa gu nyipyei, begye kwa gmi ʼshe, “Emi Nugun ye-yei nu nyi, fye wo wo.”

8Safyewyi ɓa shawye to ɓa gye Musa n Iliya yim, ɓa gye Yesu nu bwa cegni nɓai.

9Sanu ɓa ɓei kazhi ɓe ʼpe hi, Wa gna ɓa, “Fye to gna za oɓo fya gyen sai Mila laka n vingwo fya ɓei kpeda.” 10Ɓaku kwo shi fyi ɓami, ama cici ɓai dace ɓahin-ɓahin, to ɓa bwa ɓo wyega n Wo da ge, “Kalala vingwo nyi m.”

11Ɓa ya Wo aɓo nya na Yahudawayi adini tukwo-da zhin ɓa da nge tilas Iliya jezeɓe kpa (Masihu wa kpeanyi ɓe). 12– 13Yesu wa ya ɓeda Wa cige, “Tilas nu Iliya ɓe wa zhin zokwo kpa ɓehin-hin, wo la ɓe ama aza to zhin wo ɓo nbmiya m, ɓa wu wa nyi shi anabi ɓei da. Yesu wa nyaɓa ɓo na anabi ɓei da n Kristi tukwo ge Wo ɓa sin wahala n vinyikwo yi.”

Yesu Wa Ka Oɓi Gna

14Sanu ɓa ɓei kazhi n ʼpe ɓa gye aza yezhi n mwa begye ɓai na ɓo n Wo abara yi ciwa-gmanyi n ɓa ɓei cezhi nyi. 15Aza shi Yesu awye n dnayi shi Wo ɓei kashi ɓe ɓa bayi cewo, ɓa busilo dawo ɓa ɓiwo gna. 16Wa nyaɓa, “Kninya zhin fyei naɓo na je ya?”

17Zaknayiwa dnaɓe gbe wa cige, “Male, ma ɓe n ɓiyi nu Ha kawo gna, wota milo nɓedan ntuge alijanu dna lo wo mi. 18Osa alijanu lawo kala, kwa lawo kwa zunwo ʼkni. Wa pu-afugya woi gyanyikna wa fyi-fyiya. Ntu lonu mi-i gyi Ho abara wye ge ɓa kawo gna, to ɓai min.”

19Yesu wa gna Wo abara, “O, a gaiciya ga ɓiyi da, Har kniwyi nu Mi ɓa knusun fyei ya? Har kni sayi nu Mi ɓa zhin ankuri n fyei ya? Fye ɓe Mi ɓihi ya.”

20Ɓa ɓe n ɓihi, ama sa nu wo ɓei gye Yesu, zafun nukwoyi kwa lawo n kalayi kwa zun wo kni wa pu afugya woi gyi anyikna.

21Yesu wa nya wo dada ɓo ge, “Kwo ɓei yawo n kni sayiʼa?” Wa ci wo ge, “Tunyi woi ye bwasun ciwyi. 22Zafun nukwoyi ye zhin kwa zhin wo wa miya fyi ena, n nuwan yi, n nabai kwa wu wo. O, gye yi sun-sun Ha kawo gna n gye Ho ɓa mi.”

23Yesu wa nyawo ge, “Kninu zhin hoi cige, ngye Mi ɓamiʼa? Nyaho-n yahoi to dnaɓom, hoi ya ga gaiciya m.”

24Owo dada cige, “Mi n gaiciya gai lo, bmami zhin ma bwa kwo mwa.” 25Sa Yesu ɓei gye aza ɓai yezhi Wa gnakni zafun nukwoyi. “O, Zafun nukwoyi atnubua gunya n takpeɓedanyayi bi ɓe n ɓi yemi, to ha jewo lo m.”

26Zafun nukwoyi ho kwa sawyi kwa pmikwa la ɓihi kwa zun wo kni n mwa n jesun, kwa fawo sayi. Eɓihi wa shiɓo ngye wola fyi har aza cige, “Wo la fyi.” 27Ama Yesu wa shiwo bwa Wa lawo kala gni na gni, Wa wo wola lafiya bwa. 28N navun sanu Yesu ɓei gni n Wo gmanyi yi n Wa bara yi ɓa nya Wo bo, “Knihin na zhin to yi mi n zafun nukwoyi gmiya ma?”

29Yesu wa ciɓa ge, “Aɓo ye pya sai fya zhin aduwa.”

30– 31Sanu ɓa ɓei fwa ekni deyi, ɓa zan-zan fi n Galili kni to Wa ye ge aza gye wom n na bayi Wa bwa sa n wo abarayi Wa wu ɓa nya. Wa ci ɓa ge, “Emi, Kristi, aɓa knu Mi a wu Mi ama Miɓei laka n vingwo n na anyipyei ata vun.”

32Ama to ɓa bwa awyegam har odna wo ɓa to ɓa nya Wo kwa wyegam.

33Ɓasi Kafarnahum, Sanu ɓa ɓei ku si puwa n ɓa ɓei fi, Wa nya ɓa ge, “Fye ɓo da kni ɓei nu n zokwa?”

34Ama vinyikwa ku wan ɓa to ɓa dnaɓo gbem, ntuge ɓa ɓei ɓe ɓai naɓo nu najei eza nwo zhin zadnagmai n ɓa mi.

35Wa sase Wa yiɓa zhi nwo aba Wa ciɓa ge, “Eza nwo ye wa zhin zadnagmai tilas wa ze fyenu.”

36Nsayi Wa ɓe nɓiyi dna n ɓa tasin Wa la ɓihi she Wa ci ɓa ge, 37“Eza n wa ye na ɓiyi ngye za deye dna Miye, wo ye n Miyi nu. Eza n wa ye n Miyi, woye n Mi Dadayi nu n Wa tnu n Miyi nyi.” 38Owo bara, Yohanna, wa ci wo n wyihoi ge, “Male, ya gye zaho woi zhin ampanyi n Ho yeyi, woi knu alijanu ya, ama ya ciwo ge wo lafa ntu ge wo to zhin Ho bara nu n gye yim.”

39Yesu wa gna ɓa ge, “Fye to hana n woyim, gama eza to lo wa zhin atnu-tnu wo-woyi dna Miye wa pmi a vun wu, wa zhin gaba n Miyi n pye-pyeyim. 40Eza nwo to zhin gaba n yi yim, wo zhin yi nya nu. 41Ndei eza ga ho nuwan n kofi yi n tu ge ho zhin Kristi nyanu, wo ɓa bwa lada n mwa. 42Ama ndei zaha zhin zaknayi dna n na ɓiyemi wa ce bonyi gwoma a gyiwo ata wyigwo nya dnagmai dna n begye a shewo ya dna nuwan yakwo mi wa bwi nuwan.

43– 44“Nho bwa zhin laifi, la kwo zunya. Gwoma ha sase nyalo-nyalo dna na gmada n bwai gmanyi, aya ci ge a she ho ya dna, n na kota shan wun nyin, nha bwayi gyi ngnu aba. 45– 46N ho pita lo n hoi naba nukwoyi, lakwo zunya, Gwoma ha sase nyalo-nyalo n pita yi gmanyi aya cige ho lo anapyi n ha pitayi gyi ngnu aba.

47“Nho wye zhin laifi, ha kwo gmiya. Gwoma ho lo Shekwoyi bemi n wyei gmanyi aya cige oha wye gnu aba gye anapyi. 48Aba n gugurugu to shan zom, ena ce to kwoi shan wun m. 49Aba n na sansan yi gyi aza nyalo-nyalo.

50“Sankpegye dadayi to na ampanyiyim, ndei kwa fa kwo dadam. Kwo ta shan mi kwa da nya hom. Ntu lonu fye to ya fye dadam. Fye sase najei n na gmada yi.”